- ਹਰੇਕ ਕਾਰਡ ਦੀ ਕੀਮਤ 43 ਕਰੋੜ ਰੁਪਏ
ਨਵੀਂ ਦਿੱਲੀ, 25 ਮਾਰਚ 2025 – ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ‘ਗੋਲਡ ਕਾਰਡ’ ਜਾਂ ‘ਗੋਲਡਨ ਵੀਜ਼ਾ’ ਯੋਜਨਾ ਨੂੰ ਜ਼ਬਰਦਸਤ ਹੁੰਗਾਰਾ ਮਿਲ ਰਿਹਾ ਹੈ। ਇਸ ਯੋਜਨਾ ਦੇ ਤਹਿਤ, 5 ਮਿਲੀਅਨ ਡਾਲਰ (ਲਗਭਗ 43 ਕਰੋੜ ਰੁਪਏ) ਦੀ ਕੀਮਤ ‘ਤੇ ਸਥਾਈ ਨਿਵਾਸ ਅਤੇ ਵਿਕਲਪਿਕ ਨਾਗਰਿਕਤਾ ਦੀ ਪੇਸ਼ਕਸ਼ ਕੀਤੀ ਜਾ ਰਹੀ ਹੈ। ਟਰੰਪ ਪ੍ਰਸ਼ਾਸਨ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦਾਅਵਾ ਕੀਤਾ ਹੈ ਕਿ ਇਹ ਯੋਜਨਾ ਸੁਪਰਹਿੱਟ ਹੋ ਗਈ ਹੈ। ਇੱਕ ਦਿਨ ਵਿੱਚ 1000 ਕਾਰਡ ਵਿਕ ਗਏ ਹਨ।
ਅਮਰੀਕਾ ਦੇ ਵਣਜ ਸਕੱਤਰ ਹਾਵਰਡ ਲੂਟਨਿਕ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਇਸ ਸਕੀਮ ਤਹਿਤ ਸਿਰਫ਼ ਇੱਕ ਦਿਨ ਵਿੱਚ 1000 ‘ਗੋਲਡ ਕਾਰਡ’ ਵੇਚੇ, ਜਿਸ ਨਾਲ ਸਰਕਾਰ ਨੂੰ 5 ਬਿਲੀਅਨ ਡਾਲਰ (ਲਗਭਗ 43000 ਕਰੋੜ ਰੁਪਏ) ਦੀ ਕਮਾਈ ਹੋਈ। ਲੁਟਨਿਕ ਨੇ ਇਹ ਜਾਣਕਾਰੀ ‘ਆਲ-ਇਨ’ ਪੋਡਕਾਸਟ ਵਿੱਚ ਦਿੱਤੀ।
‘ਗੋਲਡ ਕਾਰਡ’ ਕੀ ਹੁੰਦਾ ਹੈ ?
ਇਸ ਯੋਜਨਾ ਦੇ ਤਹਿਤ, ਕੋਈ ਵੀ ਵਿਦੇਸ਼ੀ ਵਿਅਕਤੀ ਅਮਰੀਕਾ ਦਾ ਸਥਾਈ ਨਿਵਾਸੀ ਬਣ ਸਕਦਾ ਹੈ, ਪਰ ਉਸਨੂੰ ਅਮਰੀਕੀ ਗਲੋਬਲ ਟੈਕਸ ਪ੍ਰਣਾਲੀ ਵਿੱਚ ਸ਼ਾਮਲ ਨਹੀਂ ਹੋਣਾ ਪਵੇਗਾ। ਯਾਨੀ ਅਮਰੀਕਾ ਤੋਂ ਬਾਹਰ ਕਮਾਈ ਗਈ ਜਾਇਦਾਦ ‘ਤੇ ਕੋਈ ਟੈਕਸ ਨਹੀਂ ਲੱਗੇਗਾ। ਹਾਲਾਂਕਿ, ਜੇਕਰ ਕੋਈ ਵਿਅਕਤੀ ਅਮਰੀਕਾ ਵਿੱਚ ਰਹਿੰਦਿਆਂ ਪੈਸਾ ਕਮਾਉਂਦਾ ਹੈ, ਤਾਂ ਉਸਨੂੰ ਉਸ ਆਮਦਨ ‘ਤੇ ਟੈਕਸ ਦੇਣਾ ਪਵੇਗਾ।
ਐਲੋਨ ਮਸਕ ਸਾਫਟਵੇਅਰ ਬਣਾ ਰਿਹਾ
ਲੁਟਨਿਕ ਨੇ ਕਿਹਾ ਕਿ ਐਲੋਨ ਮਸਕ ਇਸ ਸਕੀਮ ਲਈ ਸਾਫਟਵੇਅਰ ਤਿਆਰ ਕਰ ਰਿਹਾ ਹੈ ਅਤੇ ਇਹ ਸਕੀਮ ਦੋ ਹਫ਼ਤਿਆਂ ਵਿੱਚ ਅਧਿਕਾਰਤ ਤੌਰ ‘ਤੇ ਲਾਂਚ ਕੀਤੀ ਜਾਵੇਗੀ। ਉਸਨੇ ਕਿਹਾ, “ਇਸ ਵੇਲੇ ਇਹ ਸਕੀਮ ਆਪਣੇ ਸ਼ੁਰੂਆਤੀ ਪੜਾਅ ‘ਤੇ ਹੈ, ਪਰ ਕੱਲ੍ਹ ਹੀ ਮੈਂ 1000 ‘ਗੋਲਡ ਕਾਰਡ’ ਵੇਚੇ ਹਨ।”
‘ਗੋਲਡ ਕਾਰਡ’ ਕਿਉਂ ਖਰੀਦਿਆ ਜਾ ਰਿਹਾ ਹੈ ?
ਲੂਟਨਿਕ ਨੇ ਇੱਕ ਉਦਾਹਰਣ ਦਿੰਦੇ ਹੋਏ ਕਿਹਾ, “ਜੇ ਮੈਂ ਅਮਰੀਕੀ ਨਾਗਰਿਕ ਨਾ ਹੁੰਦਾ ਅਤੇ ਕਿਸੇ ਹੋਰ ਦੇਸ਼ ਵਿੱਚ ਰਹਿੰਦਾ, ਤਾਂ ਮੈਂ ਆਪਣੀ ਪਤਨੀ ਅਤੇ ਚਾਰ ਬੱਚਿਆਂ ਲਈ 6 ‘ਗੋਲਡ ਕਾਰਡ’ ਖਰੀਦਦਾ। ਜੇਕਰ ਭਵਿੱਖ ਵਿੱਚ ਕਿਸੇ ਵੀ ਦੇਸ਼ ਵਿੱਚ ਕੋਈ ਐਮਰਜੈਂਸੀ ਜਾਂ ਸੰਕਟ ਪੈਦਾ ਹੁੰਦਾ, ਤਾਂ ਮੈਂ ਸਿੱਧਾ ਅਮਰੀਕਾ ਆ ਸਕਦਾ ਹਾਂ ਅਤੇ ਇੱਥੇ ਸੁਰੱਖਿਅਤ ਰਹਿ ਸਕਦਾ ਹਾਂ।”
ਟਰੰਪ ਸਰਕਾਰ ਨੇ ਸੀਮਾ ਹਟਾ ਦਿੱਤੀ
ਇਸ ਯੋਜਨਾ ਦਾ ਐਲਾਨ ਕਰਦੇ ਸਮੇਂ, ਡੋਨਾਲਡ ਟਰੰਪ ਨੇ ਕਿਹਾ ਸੀ ਕਿ ਇਸ ‘ਤੇ ਕੋਈ ਸਾਲਾਨਾ ਸੀਮਾ ਨਹੀਂ ਹੋਵੇਗੀ, ਯਾਨੀ ਲੋਕ ਜਿੰਨੇ ਮਰਜ਼ੀ ‘ਗੋਲਡ ਕਾਰਡ’ ਖਰੀਦ ਸਕਦੇ ਹਨ। ਜੇਕਰ ਲੁਟਨਿਕ ਦਾ ਦਾਅਵਾ ਸੱਚ ਸਾਬਤ ਹੁੰਦਾ ਹੈ ਅਤੇ ਹਰ ਰੋਜ਼ 1000 ਕਾਰਡ ਵੇਚੇ ਜਾਂਦੇ ਹਨ, ਤਾਂ ਇਹ ਸਕੀਮ ਅਮਰੀਕੀ ਅਰਥਵਿਵਸਥਾ ਵਿੱਚ ਇੱਕ ਵੱਡਾ ਬਦਲਾਅ ਲਿਆ ਸਕਦੀ ਹੈ।
